Dolphins FC players dey para and dem don yarn all man say dem no go show face to tap ball with FC Ifeanyi Ubah dis Sunday wey dey come becos dem don pack dem kaya to go strike becos of salary wey Rivers State Government no gree pay dem.

Football Naija bin report say skippo of Sharks FC sef bin yarn say him and hin team mates no go tap ball again for dis NPFL season wey dey shele until all dem bank alerts start top dey ring for phone.

As per confam amebo wey Football Naija don gather, dem never pay Dolphins FC and Sharks FC players dem salary since July and Dolphins skippo, Festus ‘Agada’ Austin relate say hin mates no go tap ball again until dem collect dem money.

“All de players don seke o. Dem dey para say dem no go train again until dem receive alert for phone.

“Dat Sunday match wey we suppose follow FC Ifeanyi Ubah play we no go show face for am. And na so e go be till season quench,” naso Austin relate (*na for Oyinbo Austin relate).

Dolphins FC skippo, Festus 'Agada' Austin
Dolphins FC skippo, Festus ‘Agada’ Austin


Coachito of de PH club, Stanley Eguma, sef bin yarn say na true be de palava wey dey shele with de club.

Hin talk say: “O’boy, de players don vex patapata o. Dem no gree train again even ontop de beg wey we dey beg dem since Monday,” hin relate (*na for Oyinbo Stanley Eguma relate).

Dolphins dey tanda for 17th inside relegation ground as e be now, and dem don gather 33 points from 31 matches dem..

Leave a Reply