Two Britico clubs wey dey ball for inside English Premier League dey eye Naija sabi player, Moses Simon, and hin Belgium club Gent don informate dem make dem pay pepper wey reach £15m to kolobi am comot.
De 2 clubs na Tottenham and Liverpool and dem don dey chase Simon tey tey, no be today. Dem bin relate all man say dem want am for 2013 before de 20-year-old pikin sign for Ajax dat year, hin com later transfer enter AS Trencin for Slovakia before Gent kolobi am.
And de guyman don dey do beta for Gent since last season as hin helep dem promote enter Belgium Pro League wit 7 goals for inside 17 matches wey hin tap ball.
Simon don tap ball for Naija for U20 level wella before dem sonch am calling enter Super Eagles and de sabi player show correct sabiness against Cameroon on Sunday and hin tear net once for de friendly match wey shele for Belgium.
Pepper wey Gent use sign Simon comot from AS Trencin no even reach £1m last year but dem don yarn all man say dem player worth money wey reach £15m for any club wey dey get longer throat..