Super Eagles sabi striker Gbolahan Salami don yarn say hin and hin teammates dem go try dem best score plenty goals when dem jam Burkina Faso for de first leg of 2016 CHAN qualifier wey go shele for dis weekend.

De ‘Nigeria Balotelli’ yarn say e go better make de CHAN Eagles kpokpo Burkina Faso wit plenty goals when dem com Naija so de second leg for Ouagaduogou go just be play play match.

“I wan make we waya dis people wella, but we need score plenty goals sef. Na for dem backyard we go play de second leg so I wan make dem fear us wella before dat time.

“I know say Burkina Faso go carry strong head come here say dem no wan lose but we go break dat strong head. Everybody wan qualify so we need tap beta soccer dat day,” Salami relate.

De match go shele on Sunday for inside Adokiye Amiesiamaka stadium for Port Harcourt, and de second leg go shele one week after dat one. Country wey win for de qualifier go promote enter African Nations Champe wey go shele for Rwanda next year..

Leave a Reply